هكذا عبرت الفنانة سلاف فواخرجي عن رأيها بقضية نانسي عجرم و زوجها
بعد الكثير من اختلاف الآراء الذي حصل في الوسط الفني حول حادثة منزل الفنانة نانسي عجرم فمنهم من كان مع الذي قام بفعله فادي الهاشم زوج نانسي عجرم ومنهم من كان ضد تخرج أخيراً الفنانة السورية سلاف فواخرجي عن صمتها لتكتب في أحد صفحاتها الرسمية في مواقع التواصل الاجتماعي :
“القانون هو الفيصل،في ظالم وفي مظلوم،في عدالة ع الأرض ولو بنسب قليلة،وفي عدالة بالسما أكبر من كل النسب…كل الناس بتطلب رأي أو موقف من الفنان ، و الفنان جزء من المجتمع لازم يقول ويحكي أكيد،بس لما تكون الأمور لسا ما اكتملت صورتها…
ولما تكون بإيدين القضاء،نحنا مافينا نبت أو نعطي أحكام وقرارات ولابيجوز نتدخل لانو الحقيقة بعدها ما وضحت والقضية شائكة جداً،ولكل الناس اللي عم تطالبني بابداء الرأي بالقضية وكأنو قراري هوي الحكم،أو لمجرد إثبات موقف أو اللحاق بسبق السوشل ميديا (والقصة مو هيك وأكبر من هيك)
بقول: أنا بوقف جنب الإنسان المظلوم بغض النظر عن جنسيته،ماحدا بيقبل بالظلم لا الو ولا لغيره،وصحيح السوري انظلم من اخوته كتير،بس التعميم غلط،وبكل بلد في الصالح وفي الطالح.
الجنسية متل الاسم مالو علاقة فيها البني آدم بتخلق معه، والعنصريين وين ماكانوا هم ناس مريضين …
وبوقف اكيد مع ابن بلدي بالحق ولو كان بآخر ماعمر الله، وكل نقطة دم منه هي من دمي ..
ولو نانسي عجرم و د.فادي مذنبين اكيد رح ياخدوا جزاءهم…
بس الموضوع أكبر مننا ومن تقييمنا وماحدا قدر يعرفه ، لحد هلأ ع القليلة … والاكيد كمان انو هنن مو مجرمين بالأصل ولا ساديين … بس في شي صار غلط وغير مقبول…
وأكيد هنن عيلة منيحة ماسمعنا عنهم كلام سئ بيوم من الأيام ، وعندهم عيلة وبنات ، والفيديوهات اللي عم تنزل والاغاني والشماتة مابتليق بانسان تعرض لمصيبة بكل معنى الكلمة ولا بفنان بيوم من الايام قدم سعادة للناس…
مانو إله طبعا ، وبيغلط وممكن يكون يتحول لمجرم بلحظة ما ..
بس مو باللحظة اللي وقع فيها نكون نحنا مجرمين…
الله يرحم ابن بلدي ويصبر أهله وعيلته وولادو ، وولادو متل ولادي وولادنا كلنا
وإن شاء الله بيرجع حقه كإنسان وبيفك الظلم عنه ، واللي صار معه حفر بقلوبنا ألم ووجع مابيخلصوا والرب وحده اللي بيقتص من الظالم عاجلا او اجلا…
اتركوا مناصب المحاماة والقضاة وبعدوا عن كونكم أوصياء ع المجتمع وكل واحد فينا عندو مية مشكلة ومية عيب ، وكلنا معرضين نكون بلحظة ما مظلومين او ظالمين…
وأكيد في شي ماحدا بيعرفه صار واللي صار أكبر من فن وشهرة ، في بيوت وفي أسرار وفي بشر …
عنا ثقة بالقضاء اللبناني وعنا ثقة بالمحامين السوريين المهمين اللي استلموا القضية وبكل المحامين العرب اللي اتطوعوا لكشف الحقيقة وتضامنوا مع محمد موسى والهم كل الاحترام والتقدير عنا ثقة قبل كلشي بالله العادل والرحمن والرحيم وخلوا البشر بحالهم ولا يكونوا سلعة نسوقلها…”
تابعوا المزيد من الأخبار عبر موقع طرطوس اليوم هنا
تابعوا قناة طرطوس اليوم عبر التلغرام هنا